Dafydd Llywelyn

Rwy'n Gomisiynydd Heddlu y gallwch ymddiried ynddo i gyflawni fy addewidion. Rwy'n gwrando ar y gymuned. Rwy'n cynnal cyfarfodydd cyhoeddus rheolaidd sy’n rhoi cyfleoedd i’r cyhoedd ddweud eu dweud am eu gwasanaeth heddlu lleol. Rwy'n gweithio'n ddiflino i gynrychioli ac ymgysylltu â phob rhan o ardal Dyfed Powys. Mae sicrhau gwasanaeth heddlu sy’n effeithiol ar lawr gwlad wedi bod yn flaenoriaeth i mi bob amser.

Pwy ydw i?

• Y Comisiynydd Heddlu a Throsedd cyfredol
• Cyn-ddarlithydd Criminoleg
• Cyn-Ddadansoddwr Gwybodaeth Gudd gyda’r Heddlu
• 20 mlynedd o brofiad gyda’r Heddlu

Beth ydw i wedi’i gyflawni

Ers cael fy ethol yn Gomisiynydd Heddlu a Throsedd yn 2016, rwyf wedi:

• Cyflwyno system CCTV o'r radd flaenaf sy'n cael ei fonitro gan swyddogion heddlu 24/7    
• Sefydlu Tîm Troseddau Cefn Gwlad i ddal troseddwyr a mynd i'r afael â throseddau yng nghefn gwlad
• Mynd i'r afael â phroblemau cyffuriau ar hyd Llinellau Sirol trwy dargedu trosedd trefnedig
• Rhoi buddsoddiad i’r Timau Troseddau Ieuenctid er mwyn lleihau lefelau troseddu ymhlith pobl ifanc
• Cyflwyno model Plismona Bro sy’n cydweithio gyda’r gymuned er mwyn datrys problemau lleol      
• Rhoi cynllun Dargyfeirio Troseddwyr ar waith sy’n defnyddio dulliau arloesol i atal aildroseddu

Mae bod yn Gomisiynydd yr Heddlu a Throsedd ers 2016 wedi bod yn fraint fawr a dwi’n ei ystyried yn anrhydedd o’r mwyaf i gael cynrychioli llais y cyhoedd ar blismona lleol a materion yn ymwneud â chyfiawnder troseddol.

Mae plismona a’r system cyfiawnder troseddol ehangach wedi bod dan bwysau aruthrol dros y blynyddoedd diwethaf ac rwy’n falch o’r hyn mae’r llu wedi medru ei gyflawni er gwaetha’r amgylchiadau heriol. Mae ardal Heddlu Dyfed Powys yn un o'r lleoedd mwyaf diogel yng Nghymru a Lloegr i fyw ynddi.

Nid yw Llywodraeth Ganolog y Deyrnas Gyfunol wedi cefnogi plismona lleol dros y 10 mlynedd diwethaf ond rwyf wedi gweithio'n ddiflino i sicrhau bod cynnydd yn y nifer o swyddogion heddlu, staff a gwirfoddolwyr sy’n gwasanaethu yn ein cymunedau. Rwyf wedi cydbwyso darparu adnoddau ychwanegol â chynnal lefelau isel o dreth gyngor. Ein cyfraddau treth cyngor ni yw’r isaf yng Nghymru.

Rwyf wedi darparu system CCTV fodern ar draws y rhanbarth, wedi sefydlu tîm troseddau cefn gwlad pwrpasol ac wedi rhoi pwyslais ar fynd i'r afael â thrais domestig a’r problemau cyffuriau yn ein cymunedau.

Mae gwasanaethau i bobl ifanc wedi bod yn ganolbwynt i mi hefyd er mwyn dargyfeirio pobl ifanc oddi wrth bywyd o droseddi. Rwyf wedi ymweld, ariannu a chefnogi llawer o glybiau ieuenctid lleol gan ddarparu grant blynyddol o £ 180,000 i wasanaethau ieuenctid yn y 4 awdurdod lleol.

Rwy'n falch o'r hyn rydw i wedi'i gyflawni dros y 5 mlynedd diwethaf ond mae cymaint mwy i’w wneud wrth gwrs. Gobeithio y gallwch fy nghefnogi ar Fai'r 6ed fel y gallaf barhau i gael effaith gadarnhaol ar y gwasanaeth heddlu lleol ac ar ddiogelwch ein cymunedau.

Fy addewid i chi

• Byddaf yn cynyddu nifer y swyddogion a'r staff dros y 4 blynedd nesaf
• Byddaf yn sianelu mwy o adnoddau i’n timau plismona bro
• Byddaf yn parhau i gynnal cyfarfodydd a digwyddiadau cyhoeddus i gynyddu llais y cyhoedd wrth lunio’r gwasanaeth plismona yn y dyfodol
• Byddaf yn adeiladu mwy o bartneriaethau trwy gydweithio gydag adrannau awdurdodau lleol, asiantaethau ac elusennau.
• Bydd diogelwch ar y ffyrdd yn flaenoriaeth allweddol
• Ni fyddaf yn penodi Dirprwy Gomisiynydd a byddaf yn parhau i leihau costau ymgynghorwyr allanol
• Byddaf yn rhoi’r dioddefwr wrth galon y gwasanaeth ac yn datblygu gwasanaeth sy'n cael ei arwain gan y dioddefwr
• Ni fyddaf yn preifateiddio gwasanaethau cymorth craidd yr heddlu